Ep46. 我們可以記錄氣味嗎？

唔知你哋最鍾意嘅氣味係啲咩呢？最近我覺得壓力有啲大，身體、思緒難以放鬆，於是我專登去聽柔和嘅音樂、做按摩、食啲清淡啲嘅嘢食、睇少咗電話，但係唔返工嘅日子都仲係好似放鬆唔到咁，於是我就諗：「咦？我其實仲有一個sense未用喎！」就係嗅覺！於是我就嘗試去搵一啲自己鍾意嘅氣味。其實喺podcast講氣味真係唔知咩玩法，但係我盡量啦！

大家對氣味敏唔敏感呢？由幾年前開始，因為留意時裝同食物對環境嘅影響，嗰種留意產品成份嘅習慣延伸到護膚、化妝品上面。我開始轉用一啲比較環保同埋成份簡單嘅產品，因為成份表短的，做research都快啲容易啲呀嘛！於是我發現原來好多有香味嘅產品都用香精，而香味喺成份表係好多時係唔會列出成份嘅。根據美國FDA，fragrance被視作trade secret商業機密，所以係唔需要列出成份【1】。因為我唔想聞一啲唔知咩嚟嘅氣味，所以我轉用晒冇fragrance（唔係冇香味啊，unscented都唔代表冇香精成份）嘅產品。過咗一排之後，個人嘅嗅覺敏銳咗，連帶對氣味嘅preference都改變咗！例如我而家好怕人噴香水，因為通常買到嘅都係勁化學味；同埋去商場例如 IFC我會就嚟窒息，因為真係好大陣味。喺廁所啲咩香氛劑、車入面嘅清新劑都係一個惡夢。。。其實真係好臭！！同埋想提下大家， 可以嘗試去organic shop聞吓玫瑰花水味，你會發現你平時喺坊間嘅一啲大牌子，聞到嘅玫瑰花水嘅氣味係完全唔同嘅。同埋玫瑰花水會根據唔同嘅產地，有唔同嘅氣味。當然唔同產地，種植玫瑰嘅環境成本亦都唔一樣！

點解fragrance（如果意思為成份，我會譯為「香精」；如果係製成品，我會用「香水」）會被視作trade secret呢？根據New York University Journal of Intellectual Property and Entertainment Law喺2015年Vol.5 No.1入面一篇題為《Lost & Found: Intellectual Property of the Fragrance Industry; from Trade Secret to Trade Dress》by Charles Cronin嘅文章，入面提到香水嘅歷史。佢話：現代嘅香水工業嘅基礎可以追溯到十六世紀嘅法國南部。因為當地有好好嘅天然環境種植各種各樣嘅植物，植物嘅花、果實、根等等成為製作香水嘅材料。十九世紀時，製作呢啲plant extract嘅商家會將產品運到巴黎，而係巴黎數以百計嘅perfume houses就會將呢的材料調製成為香水、番梘同化妝品。喺十九世紀時，呢個由採摘、加工、買手、調配、售賣製成品等嘅生產線都係家族生意。所以當時香水（或者廣義啲嚟講香味）嘅formula都只係限於好少數人。直至二十世紀，土地、勞工等成本增加，好多種植材料嘅農地都變成其他用途，而好多原材料都變成喺土地、勞工比較平嘅Algeria同印度種植。同時好多係巴黎嘅香水店一係消失一係被買起。到咗二十世紀末，單單係五間fragrance & flavour companies就足以供應全球一半嘅香味工業。因此，呢幾間公司嘅員工流動，商業秘密不再秘密。加上隨著科技發展，分析香水嘅chemical composition越來越容易。雖然我係到諗既然都係廣為人知嘅秘密，點解唔選擇公開呢，但係可能會被對家知道生產成本、供應鏈等等，又或者吓吓都有百幾種香精，個包裝盒無位寫掛

感官之中，視覺、味覺係可以自主，例如我哋可以選擇唔睇、唔食；但係聽覺、嗅覺係無得揀。眾所周知，氣味訊息會傳遞到腦入面負責smell identification、記憶同情緒嘅部位。所以我覺得我哋都有少少underrate嗅覺嘅重要性！細個睇電視見到麥當勞廣告，我就幻想會唔會有一日，賣廣告嘅時候會deliver埋個個食物嘅氣味呢？根據呢篇喺Interesting Engineering.com嘅文章，題為《The Internet of Senses: Digital Aroma》【2】，我細個嘅願望2030年就可以成真喇！入面提到Ericsson ConsumerLab嘅報告，用網上survey訪問喺世界各地如曼谷、新德里、紐約、星加坡、莫斯科、倫敦等地7627個15－69歲嘅已經用緊或者打算用VR、AR技術嘅受訪者。佢哋都相信喺2030年AR、VR會延伸到觸覺、嗅覺甚至味覺。文章提到到咗2030年，可能城市人去大自然嘅機會降低，digitally visit大自然嘅機會增加；又話玩遊戲、睇戲嘅時候，如果可以聞到當中嘅場景會更加投入等等，睇嚟大家都對佢嘅應用充滿期待同幻想！ 文中亦都指出其實我哋由1950年開始，有人已經想將氣味傳播，例如睇戲嘅時候配上嗰套戲專屬嘅氣味； 到咗1982年，有一種技術commonly referred to electronic noses，可以認得氣味同埋味道。

究竟現實之中做唔做到digital aroma呢？上文提到， 科技發展可以令到製作香水嘅商家容易分析對家嘅產品，得到香水嘅化學成份 。 文章亦都提到一個技術，叫做Scentography，用化學或電子技術去分析、儲存、製造氣味。喺2013年The Guardian嘅文章入面，Central Saint Martins嘅Amy Radcliffe嘅MA Project入面，一部佢命名為Madeleine嘅機器可以 將物件同埋環境嘅氣味吸入，然後用tenax（一種物料）吸取空氣入邊組成各種氣味嘅嘅volatile particles。佢可以幾分鐘之內可以吸到新鮮士多啤梨嘅氣味，或者用上24個鐘頭去吸收環境嘅氣味。 然後，將呢tenax寄去一個實驗室入邊，然後根據化學分析，重新製造呢一種氣味。佢話就好似影咗一張菲林相，然後拎去曬咁。

喺西班牙嘅Olorama Technology【3】，而家已經推出左可以配合VR嘅產品，即係一部機入面有唔同嘅味，然後應該係駁住bluetooth，可以隨著你睇緊嗰套戲、打緊個隻game，傳啲食物、炮彈、花香味等等。我睇睇下仲發現原來而家我哋可以重新製作埋味覺添！另外一篇喺Interesting Engineering嘅文章feature咗一個innovation叫Vocktail，個prototype係一隻杯，入邊有唔同顏色嘅燈，同埋一支可以傳遞氣味嘅管， 仲有喺嘴杯邊可以傳遞一啲電子訊息嘅electronic strips，用作stimulate 味蕾，例如180 microamps就係酸味；80 microamps就係苦味；40 microamps係鹹味。 總之就係希望透過視覺、味覺、嗅覺，去模擬飲品嘅experience， 而呢幾樣野都係可以透過一個app去控制嘅。 如果有興趣嘅話可以睇吓呢一條link【4】，雖然個作品出嚟都幾樣衰，但係呢個只不過係一個開始。

睇來，一個可以完全虛擬，但係滿足晒我哋各種感官嘅世界，同我哋都唔係咁遙遠。我反而好奇嘅係，當我哋可以儲存氣味、味道嘅時候，我哋仲會唔會咁着重親身經歷過嗰種環境、氣氛、味道呢？定係我哋會好似影相咁：以前會用雙眼去記低事物，或者花時間去將眼前嘅景象畫低，又或者會特登去影菲林相，然後等佢晒出嚟。但係到咗而家，因為我哋可以隨時隨地影相、儲存相片，所以我哋乜都影一餐，反而浪費咗當刻感受嘅機會， 喪失咗活在當下嘅情趣。 最後，我發現neroli、patchouli嘅味最能令到我放鬆，你呢？

【1】https://www.fda.gov/cosmetics/cosmetic-ingredients/fragrances-cosmetics https://www.fda.gov/cosmetics/cosmetics-labeling/trade-secret-ingredients

【2】https://interestingengineering.com/the-internet-of-senses-digital-aroma

【3】https://www.olorama.com/interactive-smells#content-2

【4】https://interestingengineering.com/future-of-drink-an-augmented-reality-experience