Ep45. 假如我們不會變老

哈囉大家好嗎？最近真係好忙好忙，因為公司實在太多嘢做，唔單止要OT，連weekend都要on call做嘢。通常我都冇乜嘢，但係今次留意到自己每當諗起工作嘅時候，個心會突然跳得好快，我就知道唔對路，身體同精神都需要休息。恐怖嘅係，因為我知道唔少書友都等緊新一集，所以我就逼自己一定要出一集。結果嗰個下晝我就自己一個喊咗出嚟。其實為咗呢個podcast已經係第二次。嗯，我諗每樣嘔心瀝血嘅創作過程都會有高高低低，it's fine，只係我要識得調節。我係真心enjoy做每一集嘅，大家唔使擔心！琴日六四，希望記憶長存於大家心中。雖然當年我未出世，但係即使係咁，我都有睇返資料，希望以能力範圍內用最真實嘅資料記住呢一件事。心情成日都比較沈重，所以不如聽下我呢一集輕鬆下！

當情緒被當刻嘅新聞、日常嘅繁囂牽著走嘅時候，你會做啲咩呀？我嘅選擇係逃走去書或者係博物館入面嘅世界。上幾個禮拜去咗香港藝術館關於Surrealism嘅展覽，如果想睇我對展覽嘅評論同感想，可以check out my Slack channel！超現實嘅展覽不能用常理去分析、理解，的確幫助到我暫時逃離現實世界。然後我又去咗圖書館啦，係入面可以慢慢揀唔同嘅書，唔會被algorithm影響到，隨手見到邊本都可以拎嚟睇，係感受到思想自由嘅片刻。最重要嘅係，同喺書局唔同，呢到借咩書都唔使錢！不過諗諗吓都唔係免費，係我哋交嘅稅。。。所以大家得閒冇嘢做都可以去下圖書館！最近睇嘅一本書係《Guns, Germs, and Steel》by Jared Diamond。書就唔係新嘅，係1997年嘅作品，應該都好多人聽過。內容帶我哋去返人類Homo Sapiens再之前嘅起源，用宏觀嘅角度分析文明發展過程，片刻嘅哀愁、憤怒突然變得渺小，都係唔錯嘅減壓方法。

今次都想帶大家減下壓，諗下一啲平時未必會諗嘅嘢。因為工作關係，最近睇得比較多關於ageing嘅資料。唔知你會唔會幻想老咗嘅世界係點呢？你會即刻諗到啲乜嘢景象呢？係都市入面嘅悲情故事，定係哈爾移動城堡入面嘅蘇菲婆婆嘅豁達呢？睇過一篇文章（source unknown），入面有一個字「longevity revolution」，其實就同Harari嘅《Homo Deus》講嘅類似，就係人類好似想變成神，想長生不老。就好似BBC呢一篇文章咁講《The ambitious quest to cure ageing like a disease》【1】，將老去呢一個自然過程變成一個疾病咁去醫治。但係咁樣就帶出咗一個問題：are we now living longer, or dying longer？我哋究竟係生存耐咗，定係死得耐咗？隨著我哋嘅醫療科技令到我哋可以更加有效地治療疾病，令我哋嘅平均壽命延長，但係我哋好似更加當自己嘅生命唔係一回事。唔係咩？如果真係當生命、健康係一回事，我哋就唔會咁夜訓、食啲垃圾食物，極差嘅坐姿、飲食習慣扭曲，為咗工作令自己身體變差。。。好似outsource咗保養健康，病咪睇醫生囉。我哋上次好好咁聽自己嘅呼吸聲係幾時嘅事？上次好好咁留意肌肉嘅鬆緊、吞嚥嘅節奏，又係幾時嘅事？一方面唔照顧好自己嘅身體，另一方面科技又令到我哋嘅壽命延長，咁其實我哋只係死得耐咗。所以呢，想live longer而唔係die longer，唔想死極都死唔去嘅話，就要聽我講，早啲瞓覺，飲多啲水，做多啲運動！

究竟living同dying之間嘅分界線喺邊度？我認為就係你真心覺得自己「老」個一刻。究竟咩先係「老」呢？之前同一位專門研究老年人嘅專家傾偈，原來我哋對老人嘅生活都係建基於我哋自己嘅想像。例如，一個60歲嘅人，好多人嘅感覺係覺得呢個係一個普遍人甚至社會政策上都覺得屬於「老」嘅年紀，但係你問返當事人，可能佢哋仲覺得自己好後生。就例如如果你問長輩，佢哋幾時先覺得自己老，我哋一般人可能覺得60歲就差唔多係老啦！但係好似我婆婆講，佢覺得70、80歲先叫「老」。佢嘅定義係當覺得自己要靠人嗰時，就係「老」嘞。似乎「老」呢一個階段有好多唔同嘅定義。隨住醫療發展、社交媒體發達、冇咁多社會既定枷鎖（唔駛一定要某一個年紀結婚生仔），我哋嘅真實年齡同身體、精神年齡都可以好唔同。當我哋可以將年齡分拆開身體、精神年齡，我哋又會唔會對於歲月流逝有更加立體嘅睇法呢？又例如而家經常reference嘅「中女」呢個字，究竟「中」喺邊度呢？似乎好多時都要將年齡作為一個界定你應該唔應該做一樣嘢嘅基準。人嘅生命係一條continuum，唔會因為歲數而突然之間行快咗、慢咗，每一日都係一樣時間，點解要用外來嘅定義界定咩先叫老、咩先係後生呢？

大家可能冇諗過自己老咗會點，我諗更加唔會諗過我哋老咗嘅世界係點，我嘅推斷係，我哋呢一代應該好難會覺得自己老！之前我同屋企人買咗一部smartphone俾婆婆，但係無論教咗幾多次，我哋始終都係用返Nokia之類嘅電話，原因係佢完全理解唔到喺電腦或者電話入面有另外一個世界，可以禁多過一個制，去一啲虛擬嘅menu，又或者可以開個Photo然後睇相。一啲大家覺得好自然嘅嘢，原來係一個unthinkable嘅世界。我哋而家覺得老人家同科技脫節，原因係我哋之間啱啱隔著足足兩個industrial revolutions，如果大家有興趣，可以google「industrial revolutions」。大概17xx年，我哋有第一次工業革命，發明機器、蒸氣同水發電；第二次喺18xx年，開始mass production同有電力；第三次係19xx年，我哋開始用電腦、automations、有得上網等等；第四次係我哋而家隨著5G同埋有更強嘅data processing technology、電源穩定等等有internet of things。每次嘅工業革命相隔嘅時間越來越短，我哋近幾十年經過咗足足兩個工業革命，喺屋企安安穩穩地照顧我哋嘅老人家，係小房子入面安然無恙地度過咗兩次全球性嘅工業革命。呢個鴻溝造就我哋對「老年人」嘅感覺同埋印象，覺得老人就係咩都唔識、脫節！但係到咗我哋年齡上變老嘅時候，我哋又會唔會一樣呢？

喺我對未來嘅幻想入面，我覺得老年嘅生活會同而家嘅認知完全唔同。我哋同公公婆婆嘅一輩距離之間係有真實同數碼世界嘅分野（real vs digital），兩者有本質上嘅唔同。前者係實實在在，睇得到摸得到嘅；後者係喺電子產品入面嘅世界。但係未來嘅發展係virtual虛擬世界，同我哋而家習慣嘅世界其實冇本質上嘅唔同，頂多係一個extension。所以我推算，當我哋百年歸老嘅時候，我哋唔會咁輕易脫節，反而所有嘢都只係而家嘅extension。冇咗鴻溝，我哋「後生」同「老」嘅分界線就更加模糊。喺未來，algorithm甚至可以估計到我哋幾時會高血壓、訓得唔好、心跳異常、腳步浮浮等等，然後直接幫我哋book醫生；而家甚至有啲產品可以在家測試我哋嘅尿液，可以即時分析我哋需要補充啲咩supplement。我估計未來唔會再有咁多「為老人設計」嘅產品，反而會將年齡淡化，變為為身體唔同嘅需要制定唔同嘅產品。另外，我哋依家覺得老人嘅孤單喺未來仲會唔會存在呢？我哋耳熟能詳嘅孤獨死，其中一個原因係佢哋並唔能夠同其他人溝通，可能第時我哋未必會兒孫滿堂，但係我哋可能會有老人版嘅Tinder、Coffee Meets Bagel，同埋足不出戶都可以同其他人喺VR甚至AR嘅世界相聚（我知講到呢度大家會諗起Black Mirror其中一集）。

到我哋年老嘅時候，我哋所認知嘅世界會同而家我哋認知嘅老人嘅世界會好唔同，我哋甚至唔會覺得自己老。而家香港嘅人均壽命去到差唔多90歲，到我哋年齡上老嘅時候，人均壽命應該可以去到100歲。隨著科技發展釋放更多嘅時間同埋automation，我哋老咗嘅時候應該會有好多好多空閒嘅時間，到時候唔知我哋又會點樣花費我哋嘅光陰呢？咁不過幻想還幻想，有啲嘢係我哋而家個個都可以做嘅，就係好好招顧身體、精神，令我哋可以live longer，而唔係die longer！

總括黎講，我係對未來都幾excited嘅！希望大家可以擺脫年齡呢個概念嘅枷鎖，將心神放落點樣先可以live longer，而唔係die longer！

【1】https://www.bbc.com/future/article/20180203-the-ambitious-quest-to-cure-ageing-like-a-disease