Ep43. 識字就等如識睇書？
個個都睇書，唔通個個都識睇書咩！哈囉哈囉咁多位書友仔，今次延續Instagram上面嘅【你問我答】嘅問題，就係點樣先會記得睇過嘅書嘅 內容或者組織睇過嘅內容，成為一個「intellectual」。先唔講我唔覺得自己能夠稱得上係一個「intellectual」先啦，我希望今集都可以拋磚引玉，同大家討論吓我自己嘅習慣同睇法。不過開始之前，不如問下大家平時抄notes嘅習慣？講個小習慣俾大家聽，我寫notes嘅時候，左邊通常大家都會留一個margin，但係我會喺右邊都自製一個相同嘅margin。呢啲都同我一陣間講我閱讀嘅習慣都有啲關係嘅！
大家細個嘅時候已經開始識字、認字，然後我哋就好似assume識得睇字就等如識得睇書。好似好簡單咁，但係大個咗又覺得好難，點解隻隻字都睇得明，但係睇完又好似冇睇咁？之前喺其中一集podcast都略略介紹過一本書Mortimer Adler喺1940年寫嘅《How to read a book》。Adler除咗係一個作家之外，其中一個身分係一位美國嘅哲學家。我仍然都係未睇呢本書，但係網上面好多文章都係reference佢書入面第一章《The Dimensions of Reading》，我略略睇過覺得非常之有參考價值。如果我可以幫大家總結一句，其實識字同識睇書中間係有一段距離嘅，而閱讀亦唔係我哋諗得咁簡單，但係亦都唔係好難。尤其是現今digital media盛行，出版門欖低，傳播速度快、成本低，每人每日都information overload，所以懂得閱讀就好重要。
根據作者，閱讀有分四個程度：
第一）Elementary Reading － 亦即係最基本嘅：睇到一隻字、一句句子，明白字面嘅含意。例如當你睇緊一本外語書，可能未係好明白呢一個語言，可能邊睇邊查字典，咁你就係做緊elementary reading。
第二）Inspectional Reading － 即係好快咁概括或者quick scanning，得出呢一段嘅文字嘅大意。譬如我同你一齊行緊誠品，我見到一本書幾得意，問你：喂呢本書講啲咩架？你睇咗十幾秒，嗰十幾秒就係inspectional reading。又例如剪頭髮嘅時候睇啲無聊雜誌、工具書等等，唔駛用腦嘅，嗰啲都算係
第三）Analytical Reading －開始一步一步咁難啲嘞。就係我哋平時認知嘅「閱讀」，要知道文章嘅題目、取態、結構、論據，消化、咀嚼文字。可能你會係文字與文字之間嘅空白位置寫低自己嘅notes，又或者想間書、抄低某一啲字詞等等。當你用analytical reading睇完一本書或者文章之後，你會深入咁了解到呢位作者對呢個主題嘅理解，但係咁樣唔代表你對個個主題有好廣泛嘅理解。呢一集開頭講到，我抄notes嘅時候會喺右邊自製一條margin，原因係我預咗喺中間用嚟抄底啲facts，而右邊就係用來做更加analytical level嘅notes，呢個亦都係我做得多analytical reading嘅習慣。呢個時候想再高一個level，就係
第四）Syntopical Reading，亦都叫comparative reading。呢個亦都係我呢個podcast最常做嘅嘢，就係不停睇唔同嘅作者對同一個主題嘅作品，又或者係特登搵一啲相反立場嘅文章比較。就算唔係立場相反，但係我都會特登搵一啲聽落去九唔搭八但係又有少少關連嘅嘢擺入同一集。咁樣就會有種驚喜同埋無諗過係咁架喎嘅感覺－－呢個就係我podcast嘅小秘密。
當然，呢四種程度係層層漸進，首先我哋要做到第一步elementary reading，即係起碼要識得個隻字，先至可以做到第二步inspectional reading；要做到第三步analytical reading，先至做到第四步syntopical reading。有咗呢一個framework，我哋就可以評估下我哋嘅弱點係邊。但係其中我唔同意嘅係，其實有時我哋係唔需要100% elementary reading先可以做到inspectional reading。例如，我覺得大家有時會因為要睇睇吓查字典而打斷咗個書嘅思路。其實只要做到70－80%睇得明，係唔需要停底查字典。我記得細個嘅時候，一位英文老師教我哋嘅係唔準查字典，要靠個context同上文下理估到嗰隻字係咩意思。呢個真係畢生受用嘅貼士，因為現實世界真係好少會得閒查字典。如果我哋一味依賴字典，我哋就唔會鍛鍊到對上文下理嘅敏感度。試諗下我哋有咩可能識晒世上所有嘅生字？同埋唔係所有生字都要識。每個人都有自己嘅書寫風格同埋興趣，自然識嘅字都唔同，所以我覺得有時靠估都不失為一種學英文嘅小聰明。
既然Syntopical reading好似好犀利咁，係咪每時每刻都要做到syntopical reading呢？當然唔係啦，ain't nobody got time for that！Analytical and syntopical reading需要用到嘅精神同心力都好多，我就係覺得大家有時唔係好識分邊啲時候用邊一種閱讀嘅方法。例如睇新聞、小說、newsletter等等，其實inspectional reading已經足夠。而我自己嘅貼士係，其實同一篇文章，係可以睇幾次嘅。基本上我睇任何嘢都係inspectional reading先，覺得ok喎，先會做analytical reading；再有興趣啲先至做syntopical reading。而其實絕大程度上，英文科考試都係考緊inspectional reading。。。所以其實準備公開試都只係訓練到我哋做level 1 & 2嘅reading skills。其實閱讀嘅目的有時唔係要知道啲咩，而係要知道自己唔知道啲咩。借用explainerhk嘅比喻，我哋嘅知識就好似一張地圖咁。我哋每次認真睇一本書嘅時候，要gauge究竟呢本書係地圖上嘅咩位置，有啲咩地方去過，有啲咩地方仲係未發掘嘅。下次再睇相同topic嘅嘢，不妨可以用inspectional reading去睇，如果睇唔同嘅範疇先再試試用analytical reading。
Syntopical Reading最難，我覺得原因有三個：
第一）要識得自己搵唔同嘅sources去做syntopical reading。平時返學都會有recommended reading list，但係當你畢咗業，或者平時想深入了解一個topic，就唯有自己去搜尋同埋揀reading materials。茫茫書海，有時我會睇Amazon嘅algorithm，嗰啲recommended list，又或者會search下關於本書嘅文章，睇下文章入面有冇提過其他作品；最常用嘅方法係大約記得呢個topic，之後好隨緣嘅情況底下遇到相似topic嘅書。所以個過程同做研究幾相似，都係要為自己釐定搜索範圍，單單係搵sources都已經要花少少心機。
第二）因為兩個作品可能主題相同，但係作者嘅切入點同理解都可能好唔一樣。加上Analytical Reading只係需要跟住作者嘅思路走，但係syntopical reading就好似有兩個朋友，一個行東一個行西，你要自己搵到一條中庸之道，係一個要自己set agenda、摸索嘅過程。你要自己釐定一條呢兩位作者可以解答到嘅問題，例如有啲咩common theme或者argument，然後梳理好，比較邊個有說服力啲。就係因為呢一種閱讀方法要靠自己，所以一定會逼到你有自己嘅意見。去到呢個咁confusing嘅moment，就會逼到你寫低你嘅諗法，亦都係一個所謂「intellectual」最重要嘅一個特點，就係有output。
第三）就係要systematically output自己嘅諗法。我哋好似覺得睇咗啲字就叫睇咗本書。其實如果冇output嘅話，我哋點知我哋有消化到本書嘅內容呢？其實呢個一直都係我咁堅持劃花本書、同埋養成喺margin寫notes嘅原因，因為佢可以keep me on my toes，當我留意到自己成幾版書都無任何嘅notes，咁原因只有兩個：一係本書好垃圾，一句值得記低嘅嘢都無。一係我冇專心睇書，所以冇留意當中嘅內容。另外就係我哋一直都唔習慣同朋友介紹或討論一本書。通常係介紹嘅過程當中，交談之中嘅問題同對答，都對consolidate我哋睇過嘅嘢好有幫助。唔知大家上次紀錄自己睇過嘅書，又係幾時嘅事呢？
回想返自己點樣訓練analytical & syntopical reading，其實唔係要多閱讀，而係要多寫作！因為呢兩種閱讀嘅方法，需要好多processing power，而寫作可以幫助梳理思緒，我好難想像到點樣可以喺冇output嘅情況底下練習到analytical & syntopical reading。但其實都係有trade off嘅，因為我因此喪失咗寫抒情文嘅時間同心神，亦都少咗睇到文字之後嘅感興。我細個時候，最叻係寫抒情文，但係知道最容易攞分嘅係議論文or argumentative essay，而我又take History，所以必須要非常理性，有邏輯地論證，加上之後讀MPhil都係需要整理好多唔同嘅sources，都訓練到analytical & syntopical reading。
另外，我哋要培養到消化複雜嘅ideas嘅能力，除咗要多output之外，我覺得第一樣要做嘅就係要睇少啲videos同埋要訓練專注力自主。而家我哋可以接觸太多bite size嘅文字、訊息，而正如《娛樂至死》呢本書都會講到，唔同嘅媒體會影響idea complexity；而我哋又習慣俾其他媒體帶住我哋嘅專注力走，需知閱讀係需要我哋actively將我哋嘅心神focus喺文字上，所以點解咁多人鍾意睇垃圾TVB，係因為唔洗用腦放空都可以好似睇咗啲嘢咁，係腦部嘅junk food。而我最討厭嘅就係嗰啲咩可以幾分鐘講完一本書講咩個啲雞精app，同埋啲咩一年 睇100本書個啲自吹自擂嘅claims。閱讀係訓練思考，睇100本書唔代表會聰明100倍，而雞精版亦都只係承認咗你係冇耐性訓練自己思考，如果係啲咩工具書都算啦，但係如果真係認真想睇深入啲，其實睇書同做運動一樣，都係冇捷徑嘅
最後，唔知大家有冇e-reader呢？唔單止係文字同圖像嘅分別，就連喺電腦同書本上睇文字都有唔同。回想返網上或者電子儀器上面嘅文字，好處係可以隨時更改字體、大細、背景光線等等，但係我反而唔鍾意睇嘅時候冇咗一個睇到邊度嘅bearing（雖然有個percentage bar），唔似得一本書可以知道自己睇到邊。其實大部份都係俾大家做inspectional reading，如果要做analytical reading，我好少會依賴電子儀器上面嘅文字。我就係因為我自己好著重要同啲字有交流，例如我最唔習慣嘅係我唔可以間書，同埋係margin度寫notes。所以我記得當時寫paper，都係成間房都係紙！
所以我一直都話，我嘅podcast承蒙得到大家嘅喜愛，係一樣我覺得有啲愧疚嘅：因為我其實某程度上逼自己將唔同嘅主題梳理好，將每一集當作一個訓練自己output嘅練習，都幾自私架！但係好開心大家都聽得開心。今集雖然唔係講啲咩大道理或者好聽嘅故事，但係總算了咗我自從玩【你問我答】之後嘅一個心願，希望大家都會愛上訓練analytical & syntopical reading，寫更多嘅文章，share俾更多嘅香港人睇，咁我哋嘅文化圈先會越做越闊！