唔知你心目中嘅革命係乜嘢一回事呢？今日我同朋友去咗Eaton Hotel，係外牆嘅海報已經改成烏拉圭攝影師Pablo Albarenga嘅作品，內容係亞馬遜雨林被砍伐的森林中，喺黎明時分光與影之間孤獨挺立於土地上面嘅大樹。但係相信大家都會記得過去嘅一年，同一個位置佈置咗一個我哋好多人都會問自己嘅問題：「你嘅生命變革係點樣嘅一段故事？」佢陪伴著我哋度過咗好多個日曬雨淋嘅春夏秋冬，驚恐嘈吵、煙霧彌漫、勇氣不朽嘅日頭同夜晚。What does your revolution look like? 究竟，喺我哋嘅心目中革命嘅意思係啲乜嘢呢？

唔知大家中學嘅時候，有冇讀歷史呢？回想返，我覺得歷史呢一科係對我嚟講影響好深嘅一科。我以前有讀心理學啦、地理、歷史，前面兩科我好多嘢都記得，但係唯獨是歷史真係唔記得晒。因為嗰時讀一間英文中學，歷史有分世界歷史同亞洲歷史，世界歷史都係講第一次第二次世界大戰，嗰時我覺得同自己好遙遠；亞洲歷史就係中國日本近代史，以為同自己文化距離比較近，但係搞笑啦用英文讀中史，搞到不倫不類，日日係度講咩「Cixi」、「Hundred Days' Reform」，真係唔係好知自己讀咗乜，同人傾計都跑唔到書包。點解我話對我影響好深呢？雖然我唔記得晒個內容，但係考歷史講求嘅係觀點同論述，一條問題唔係非黑即白，可以同意、不同意，只要有證有據，論述清晰有邏輯，就可以。我學識嘅係，世事會有兩面，每個人有自己嘅觀點，重點係理據、邏輯。當年好鍾意問嘅問題係，「xxxx年至xxxx年期間嘅XXX，算唔算係一場革命？」

好似好嚴肅呀呵，咁不如我哋大家去到海邊。。。幻想我哋係海邊散步，腳下面係凹凸不平嘅沙，我哋赤腳喺海邊慢慢咁行，微風同埋濕濕笠笠嘅空氣吹住頭髮，突然落咗一陣微微雨。我哋望下自己身上面嘅衫，用蠶絲入面嘅蛋白質同海藻製成，件衫好輕，半透明嘅。係雨中漫步嘅我哋慢慢見住件外套慢慢degrade，我哋唔知點解好想行入啲海水度，然後我哋件衫就完全消失咗。呢個係倫敦嘅Central Saint Martins畢業生Scarlett Yang嘅一個關於bio-fashion嘅研究[1]，得到LVMH嘅資助，focus喺biodegradable materials（可分解物料）。佢話研究嘅目的係挑戰物料lifecycle嘅概念，每一件衫嘅質地、持久度會隨著環境、季節、著嘅人嘅習慣而改變。我覺得好似將件衫提升到好似皮膚咁。我哋之前提到嘅快時尚，就係話啲衫嘅質素好差，好唔襟著，所以反其道行之，就係慢時尚，要追求買一件classic、耐用嘅衫。呢一個發明得意嘅係，假如我哋話，既然快時尚對環境同勞工唔好，加重堆填區負擔；咁我哋不如去到盡，發明一件一日之內就可以分解到嘅衫！又或者係濕咗水可以隨便改變形狀，same same but different outfit，咁又得唔得呢？完全改變製造過程同原料，同我哋對一件衫嘅lifecycle嘅概念，唔知咁樣算唔算革命呢？如果大家對未來嘅世界有興趣，我想大家依家即刻follow一個instagram嘅account，叫The Future Laboratory。

可能大家對食物方面嘅新發明會有多啲認識。之前同一個朋友討論食物嘅innovation，提到而家有好多素食嘅發明，例如用豆扮嘅蛋、肉，甚至3D打印出來嘅肉、或者用植物蛋白質整出嚟，係實驗室種出嚟嘅肉等等。我哋食飯嘅地方，甚至有一個watermelon steak，係用風乾咗嘅西瓜扮牛扒。我哋概括，食物方面嘅「新發明」分兩個方向：一種係用分解一啲現有嘅物料去合成／扮一啲本來已經存在嘅食物。另外一種就係改善而家現有嘅食物嘅烹調、種植方法。我問：係實驗室種／印啲嘢食出嚟算唔算係食物革命？佢將我哋對動物、植物、土地、季節地域天氣嘅依賴減低，算唔算係革命？

回顧返歷史，第一次工業革命係1700－1800年期間，我哋由人手轉到用機器，用蒸氣、水力推動機器。亦都令我哋由務農轉到現代經商嘅生活模式。用機器生產令我哋對人手嘅需求降低，效率上升，令生活質素提升，同埋階級觀念嘅轉變，究竟擁有土地嘅貴族重要啲，定係擁有工廠嘅商家重要啲？另外其中一個例子就係，雖然印刷技術早喺十五世紀發明，但係一路都係用人手排版。第一次工業革命嘅發明，令印刷機嘅操作人手大減、印刷面前更大，令到知識、消息嘅傳播更快。第二次嘅工業革命，煉鋼嘅技術越趨成熟加上由蒸氣去到發展電力，令通訊、交通等科技突飛猛進，有人話係全球化嘅開端。人類嘅生活有咗翻天覆地嘅改變。第三次嘅工業革命，就係我哋開始用電腦。第四次工業革命，係人工智能、quantum computing、biotechnology、Internet of Things等等，就係我哋宜家生活緊嘅世界。

究竟革命嘅定義係乜？喺歷史上政權嘅終結唔一定代表係革命，因為一個專制政權結束去到另外一個專政，唔係革命。如果應用喺其他範疇，例如工業革命，革命就係翻天覆地嘅改變，對社會結構上作出極大嘅改變。喺每一日都有新鮮事嘅2020年，可能我哋都有少少saturated with newness。呢一篇稿，只係想提醒自己，唔好將新鮮同革命混淆。當我哋睇到新嘅發明，好多時就有一種false optimism，覺得世界做緊嘢嫁喇，我哋冇咁差嘅，科技真係可以幫到我哋。但係好似我嘅朋友所講，可能所謂嘅「新發明」只係一種逃避，令我哋唔記得問題嘅本質。本質唔係因為我哋冇一種新嘅科技、物料去做衫；我哋今時今日有咁嘅結果，係我哋對物質無止境嘅追求。假設我哋以後都著呢種每一日都可以以新嘅形態出現嘅衫，係咪就冇晒所有overconsumption嘅問題呢？我哋一樣會要求得越來越多，越來越靚嘅衫。整新嘅衫係咪唔洗energy？好啦假如可以將可再生能源，我哋係咪就可以滿足我哋無止境貪婪嘅慾望？係咪用大豆代替蛋、肉，世界嘅貧窮就解決咗？有冇諗過其實都係要用食物去代替？係咪用粟米整嘅可分解膠袋就係解決問題嘅方法？有冇諗過我哋呢個世界究竟要種幾多粟米但係又唔係俾人食？

有時，一種砍掉重煉嘅勇氣，只係用嚟逃避問題嘅本質。問題係人類貪得無厭，予取予求，毫無思想盲目生活，覺得自己係地球嘅主宰。咁樣嘅話，再多嘅發明都唔會算係革命。或者，喺二十一世紀，科技嘅革命會越來越常見。寫到呢度，我諗起我睇過嘅一本書－－Thomas Friedman嘅《Thank you for being late－An Optimist’s Guide to Thriving in the Age of Acceleration》[2]。講嘅係我哋嘅科技發展越來越快，已經去到一個超過咗human adaptability人類可以適應嘅速度。我哋唔係需要科技嘅革命，而係思想嘅革命。所以，food revolution / fashion revolution所革嘅唔係科技，革嘅係我哋同食物、時裝嘅關係。其實去返以前個一種珍惜得來嘅資源算唔算係革命呢？一種對人生而為人、道德價值、公平、公義嘅覺醒。例如冇一個第三世界國家值得將佢哋嘅食物餵牛，自己捱餓然後俾先進國家嘅人$188火鍋任食嗌完食唔晒倒晒佢。呢啲都係我哋值得而家諗下嘅問題。正如文章開頭所講，一條問題唔係非黑即白，只要論述清晰有邏輯，就可以。咁唔知你又覺得我哋人類嘅變革又係點架呢？

References:

[1] https://bafcsm.com/portfolios/scarlett-yang

[2] https://www.amazon.com/Thank-You-Being-Late-Accelerations/dp/0374273537